زجل مغربي تحت عنوان
يا خسارة العقل...............
كلامي ليك يللي عمرك بين العشرة والعشرين..
نتمنى تستلغا لكلام وتسمع بالعقل قبل الودنين..
شد ف.قرايتك وصبر شحال ما طالت السنين..
العلم ينور الطريق والجهل يعثر الرجلين..
وإيلا ما وصلتي عليك بصنعة اليدين..
دير ف.بالك الصنعة سترة و تغنيك بعد حين..
يمكن تزيد ف.لعمر كيف قالو سيادنا اللولين..
إياك تغلط أو يدورو بيك اليدين..
حضي راسك من البلية وصحبة المتهورين..
إياك الغبرة والخمرة أو تجرب التدخين..
بعدما تكون صالح تصبح من الخاسرين..
شحال من واحد بداها بدوق وجرب ولقا راسو مع المقرقبين..
يغرق في مصايب تحجب الدماغ وهاذا حال المدمنين..
بين الدروب يسعى أو يطول صباع اليدين..
وإيلا غاب العقل يتسلح بسيف أو سكين..
يضرب في العباد يعود في الحبسات مع المجرمين..
ما ينفع البلاد ما يخلي حبابو به معنيين..
يوسخ وجه الخوت يشغل بال الوالدين..
لا مستقبل كيف قرانو لا هما عليه مهنيين..
ومللي يخرج يكون خلاص من الضايعين..
داز عمرو ف. لحبسات وفاتت عليه السنين..
البرودة نخرات العضام والضبابة طلعت ع.لعينين..
لا حروف في الراس لا حرفة تلحقو بالركاب الفايتين..
مكروه محسوب مع للي في الأرض غير زايدين..
لا خيمة لا مرا لا ضناية ليه يكونو عوين..
يرجع ينادي يا ربي رحمتك راني اليوم من التايبين..
لكن بعد آدش ؟؟
العمر ما يولي ولعوام بلا جناح طايريين..
يا خسارة العقل للي مشا بين دوق وجرب يا حزين..
سعاد مبتهج
ليست هناك تعليقات:
إرسال تعليق