((التين والصبار ))
ياتين ياصبّار شوكاتك كبار ..
لابس لباس محصنة ومالا زرار ..
صامد بعز الشوب ويلي مرجلك ..
متل الحرس واقف عباب السلحدار ..
وتينك شمخ تيدق راسو بالفلك ..
وفكرك بأنو اللي بقو كلن قصار ..
واللي بيقرب صوب مملكتك هلك ..
عندك حراب موزعة داير مدار ..
عفواً إذا بتريد بدي اسألك ..
تواضع ؛؛؛ وبلاها رفعة المنخار ..
كلك عبعضك ثمر واللي حاملك ..
أرض اللي حملت آدم ومافي عمار ..
صحيح... انك صعب للسالك سلك ..
ولابتنقطف عاشكل حبات الخيار ..
ولابتنزرع قدام بيت الزارعك ..
ولابتنحسب للي رعى حسن الجوار ..
ولانك جميل كتير الله ياخدك ..
ومانك حفيف ونسمتك كلها أُُبار ..
ومانك لطيف الفيّ ربك حارمك ..
هربان ضيفك ما ألو تاني خيار ..
بس ؛؛؛؛ بشهد شي إيجابي في الك ..
الشغلة الوحيدة طعمتك بالإختصار ..
من غير أذن بتقعد بصحن الملك ..
ولونك عسل متقشر بقلب الجرار ..
أنو عجيبة هالمهيمن عاملك ..
برّا أذية وداخلك عز الثمار ..
يبدو درس للي بيجهل جوهرك ..
لا يضل متأمل جنود الإنتظار ..
يا إبن آدم : هيدي حكمة خالقك ..
بأرض وسما متجسّدة وكل البحار ..
عالشمس يعلى إذا بدك منزلك ..
وبدك ما واحد بالأوادم يجهلك ..؟
أقطف عمل كالتين والصبّار ..
----------------------------------------
بقلمي : رامز سلمان حسن
ليست هناك تعليقات:
إرسال تعليق