شعرٌ محكي
(طل الشتا )
طل الشتا وتلفّتْ العصفورْ
صوب السما عم تكدحْ الغيماتْ
والريحْ عم تعزفْ على مزمورْ
متلْ ال...كأنّو لحن جنيّاتْ
وها..الطيرْ بعيونو الحزنْ منظورْ
ولولا شويّة بتنزلْ الدمعاتْ
يمكنْ براسو فكر عم بيدورْ
عن برد جايي وتابعو تلوجاتْ
عنّ...الدفا....ببالو وبقي مذعور
عابيت صاغو قش ووريقاتْ
ولا ضلّ...تين. ولابقي زعرور
ومحتار كيفْ يأمّنْ الحبّات
ويمكنْ مرق ..عا...خاطرو المكسورْ
ذكرى كروم العنب والكرزاتْ
ويمكنْ تذكّرْ حقلة المنتورْ
وعطرْ السواقي ومغطسْ الميّاتْ
ياما...تهنّا بالجنا مسرورْ
واليوم عم يتشردق بغصّاتْ
قرّبْ عاشبّاكي خلفْ بلّورْ
متلْ القصد تا...أسمعْ النهداتْ
وغنّى عاشبّاكي نغمْ مقهورْ
وزمّ الجناحْ ونقودْ الخشباتْ
كنّو اعتبرني صاحبْ وميزورْ
تا...يسألو قولك القرميداتْ
فيني تحتهمْ ألتجي مستورْ
ياشاعر بتنسجْ شعرْ وشعورْ
..........وجيبْ العيالْ وأمّهمْ ونباتْ....؟؟!!!
بسام الأسبر
ليست هناك تعليقات:
إرسال تعليق