مُغرَم !!!
شو عملتِ فيّي يا بنتْ
تا اوقع عا راسي طَبّ ؟
كيف بنظرة منّكْ دبتْ
وسكنتِ جوّات القلبْ ؟!!!
مش عم اسأل عن سرّك
أو كل شي فيكِ بينحَبّ
أنا عم أسأل عن سحركْ
اللي بيفتنْ وحيات الربّْ ...
شو عملتِ فيّي يا بنتْ
تا اوقع عا راسي طَبّ ؟
البراءة بعينك آية
وخجلك سُورة من العفّة
أدَبكْ للعالم راية
بكفّة والكلّ بكفّة ...
يا ربي شو متمنّي
تحطي راسك عا كتفي
ويقرّب قلبك منّي
ويسقيني كاسات الحبّ !!
شو عملتِ فيّي يا بنتْ
تا اوقع عا راسي طَبّ ؟
ما غرّد قلبي لغيرك
ولا طار بيوم لبستان
إلا من يوم الْ عرفك
صارت نبضاتو ألحان ...
مش ذاكِر إلا إسمكْ
وصورتك من كلّ النسوان
مش قاشع إلا شمسك
مسكوبة عا قياسو سَكبْ !!
شو عملتِ فيّي يا بنتْ
تا اوقع عا راسي طَبّ ؟
عامر ...
ليست هناك تعليقات:
إرسال تعليق