ومضَة ...
طَفّ القلمْ
والحبْر لوّتْلي الوَرَقْ
كل الكلام
الْ كان بسْطْورُه احترق ...
من قهري ضيّعتْ الحَكي
وعيوني غرقتْ بالبِكي
قالتلي: وينها رسَالتي ؟
قلّتلها : مكتوبي انسَرق !!!
قالتلي : قلّي أيَّ شِي
ياريتها بتكوُن وشوشي !!
جاوبتها شو بحبّك أنا
خدّها على شفافي التصق ...
ورجعت ضيّعت الحكي
وهيّه عَا صدري تتّكي
نهداتي صارت تشتكي
وقلبي بجمراتو انسَلق ...
حسّيت بأنسام الرّبيع
والورد حولينا عَبَق
مع انو نحنا بالشّتي
لا رَعَد جوّنا ولا بَرَق ...
قالتلي يالله تأخّرتْ
ساعتها قلبي شو خفق
قلتلها خلّيك معي
قالتلي: وأخيراً نَطَق ...
عامر ...
ليست هناك تعليقات:
إرسال تعليق