(دفتر الأيام ) شعر محكي
التسعة عشر ضبضب كلاكيشو
وتصدّر العشرين عرش العام
انشالله ب يشفق عادراويشو
هاالعام وب تتحقق الأحلام
وطير السلام اللي نتف ريشو
وبردان طول الوقت مابينام
انشالله ب يحلا هاالسنة عيشو
وب ريش ناعم تكتسي الأجسام
والحرب يبعد شبح شاويشو
والسلم يلقانا ب ثغر بسّام
وشيخ الكره يرمي طرابيشو
وشيخ المحبّة يرفع الأعلام
وشيخ الخمر يفرح ب عرّيشو
والخير يرضي الكرم والكرّام
وفلّاح يتهنّا ب شنكليشو
وخضرة تسرّ الغنم والغنّام
وبستان تشبع بالغذا شروشو
ويعطي فواكي ناضجة وشمّام
والطير يرجع يبتني عشوشو
وترجع الغوطة غوطتك ياشام
والفكر يلمع نجم قاشوشو
ب وحدة ثقافة تجمّع الأقلام
وتعمر سوريا ب أحمد وميشو
والمحبّة تصهر الأجيال
وهيكي ب يظبط دفتر الأيام
شعر : بسام الأسبر
ليست هناك تعليقات:
إرسال تعليق