( عمر مقتول )
فتحت الدرج بخزانة النسيان بان
وجه الدني بمفقودها ومولودها
شفت العمر مقتول عا كومة زمان
مد المدى ممدود من ممدودها
لا حروف إلها ولا زوايا ولا أمان
مرفوع عا قمّة وهم عامودها
وع كل دروبها ما في أثر عنوان
حدّ الفكر ما حدّ حدّ حدودها
حدّ النظر محدود حدّو بالمكان
ومبني على المجهول فعل خلودها
وعين السما فيها عمى ألوان
وعين الدني نامت ع سر وجودها
شفت عين البشر مطمورة الأحزان
وأم الخليقة دموعها ع خدودها
بين العتم والربح طار الشمعدان
جراد العصر عم ياكل بمحصودها
وشفت العقل . . موسوعة النسيان
وبنت الزمن متل الصبيّي نهودها
متل العريشة دموعها خمر الأوان
وبتفرفط الأحلام من عنقودها
ما لقيت غير الصدق والحب والإيمان
مدلولها ع دروبها ل معبودها
من هون مشوار العمر رح يبتدي
تا يلتقي موعودها بمقصودها .
: عيسى فضة :
ليست هناك تعليقات:
إرسال تعليق