( ليلة شتا ) شعر محكي
مرّة بليلة شتا والوقت بي كانون
غفيت عيون الأهل عاصوت مزرابي
والليل طامي ظلامو والعصف مجنون
والريح تعزف لحن بتقول شبّابة
والناس نامو بضيعة وحلمهم مفتون
ب غيوث تحمل رجا للحقل والغابة
ووحدي عشيق السهر متأمّل ب هالكون
نلشر شراع الفكر ببحور سرسابي
وموقد بقربي وقودو من خشب زيتون
والبيت غمرة دفا والنار لهّابة
وسمعت نقرة خفيفة صوتها موزون
والليل نصفو مضى مين ال على بابي
وفتحت بابي وعرفت الوجه مين يكون
وفاتت بسرعة وعا تمّا تحطّ سبّابة
وهمست بأذني قتلني البرد ياملعون
وعندك غمار الدفا ولا تقول كذّابة
وشلحت الشال وريحة شالها ليمون
وغلّت بصدري كأنّو النار بعبابي
غرقنا بجو الغفا وتسلسل المكنون
شوقا عا صدري احترق واحترقت عصابي
وكانت عشيّة سكر والسكر عنّا فنون
ماضلّ نقطة خمر إلّا جرعناها
وماكنت أقبل عذر تا تفرغ الخابة
شعر: بسام الأسبر
ليست هناك تعليقات:
إرسال تعليق