. العماد ( الميرون )
بالله تهللوا يا نسوان
وغنوا للأمير الزين
اليوم عماد الغالي
يا مرحب بنور العين
-------
هيدي فرحه ما بتنعاد
هيّه فرحة ها العماد
لبسوه الثياب جداد
من العطر حطو شكلين
-----
ردوا معاي و قولوا
ريتو مبارك ميرونو
ويا سعدو بأشابينوا
بينحطهم برموش العين
-----------
اشابينا من كبار الناس
ذهب مرصع بالألماس
كلهم نخوه عزة راس
من الأكارم معدودين
----------
ظبتوا البدلة وهندامو
الولد غالي على عمامو
بيحمو ظهرو وقدامو
وع الشمال وع اليمين
-----------
حطو النياشين بشالو
الولد ثلثينو لخوالو
بيرخصو الروح كرمالو
ماهمن صرف ملايين
---------
ها الولد خي البنيات
نعوم وحب الحلوات
طعمونا سكر نبات
تا نغني ياليل ياعين
--------
فتحت ورودنا بالدار
عم ترحب بالزوار
أهلا وسهلا بالحضار
كلهم ع القلب غاليين
.. غانم ع الخوري ..
ليست هناك تعليقات:
إرسال تعليق