/ العيد والواقع /
هالعيد جايي هالسني جابي
ولابس قميصو بلون عنّابي
بعز الشتي عا صوت هالمزراب
بكف الصلى دقدق على بوابي
ولا كهربا والغاز غاب وداب
وعم ترجف من البرد أعصابي
تلبكت يا بفتح أنا هالباب
والضو مطفي وفاضيي جيابي
يا بضل جوّا إبرم الدولاب
وسجّل حضوري بدفتر غيابي
قبل الصبر مايكون شعرو شاب
فتحت وأنا ع الباب جنّابي
قلّي ياشاعر . . زهّر العنّاب
والعيد كاسو اشتاق للخابي
قلتلّو وقّفلي معك في حساب
بدي معك صفّي السني حسابي
أرجوك خزّقلي سند العذاب
وجمّد رصيدي بمصرف عذابي
بتاني سني انطرني تجيب تياب
ولفّ الهدايا وفوت ع تيابي
بلكي الحلم بيكون جرحو طاب
وتشفى السعادة برجعة حبابي
واكتب أنا بحضورك كتابي . د.عيسى فضة
ليست هناك تعليقات:
إرسال تعليق