زجل مغربي تحت عنوان. :
يا راجل إياك تعنف المرا.....
يا راجل عندي ليك الكثير من الكلام فحق للي معاك في العشرا...
اتقي الله في المرا واعرف أن للي ولداتك حتى هي مرا...
نسيتي يوم شفتيها أول مرة ؟؟
كانت تبان ليك كيف نجوم السما وأحسن من الكمرة...
كنت تعد الأيام بالدقايق باش تشوفها كل مرة...
اليوم ركنتيها ونسيتيها أو يمكن عنفتيها ومشيتي مع أخرى...
خليتيها تعاني المسكينة مهمومة تموت من الحسرا...
مرض كيف الطاعون ما يفيد معاه طبيب ولا دوا...
إيلا نسيتي يا ناكر الحسان...
تفكر هي اللي دارت ليك الرسام والأولاد...
يوم كنت والو صبرات وعانات صاينة ليك الأوتاد...
ما قهرها لا جوع ولا عرا وحسباتهوم معتاد...
تتباهى قدام قراناتها وخا ما وصلات اللي نوات عليه بعدا...
سهرات وربات بكل ما فيها جهدا...
ما همها للي شبعات جوهر وذهب وهي تعاني الشدة...
غدا يسولك الرحمان على كيف كنت تعامل المرا ؟؟
يا خوفي عليك من حسناتك تأخذ ليك بالكثرة...
يا راجل وصاك عليها الخالق ومحمد خاتم الارسال...
للي كرمها يكرمو الكريم وللي هانها يتسمى ظلام...
يا سعد من كرمها وبرحمتو كاسيها...
ما طمع في فلوسها وللي خلاو واليديها...
ما خانها ما هانها ودايما عروسة وخا طالت العشرة...
وإيلا بانت ليك كشفات رآه ماشي هي للي قصرات...
هذا من جهدها للي عطات ولا يوم عليه تجازات...
تطبخ ، تنظف ، ويمكن لوحدها ربات...
هجرتيها وحرمتيها من جميع الصلاحيات...
كسرتي جناحها يا راجل كسىرات...
ما شكات ما بكات بعدما نشفو دموعها بالحسرات...
يا خوفي عليك يا راجل الدنيا رايحة والحساب غدا...
يا راجل صالح نفسك و بر بيها قبل ما تتلام...
وإياك من حساب الرحمان وسخط محمد خير الأنام...
ياك صدق يوم قال :
ما يكرمها الا كريم وما يهينها الا لئيم...
يا راجل إياك تعنف المرا...
سعاد مبتهج،
ليست هناك تعليقات:
إرسال تعليق