زجل مغربي بعنوان:
يا خاين العشرة......
يا خاين العشرة تمنيت كون ما عرفتك...
أيام وشهور وأعوام وأنا فرحان بعشرتك...
ما ظنيت بعد سنين نكون غلطت في طينتك...
عديتك من حبابي وشحال تباهيت بسيرتك...
اليوم عرفت شكون أنت وحقيقة شخصيتك...
تنكرتي ليا ولليد للي بيها شحال عطيتك...
نسيتي القلب وإخلاصو للي بالوفا هديتك...
أياك تلومني وتسأل علاش ما حييتك ؟؟
معدني حر لا تخليني نقول ما شفتك...
لا تستغرب يا عديم الصدق يلا ما صافحتك...
لا تمد ليا كفك نرجاك باغي ننساك أو يمكن نسيتك...
كنت البادي بالخير والإحسان شحال وفيتك...
وأنت قابلتيني بالغدر للي ما سبق ليا فيك نويتو...
يا خاين العشرة...
لا تحاول تتقرب مني، راه قربي ما يليق بيك...
لا تسألني علاش قسيت ؟؟ والقسوة ذقتها فيك...
خسارتك ضعفتي وما فكرت يوم تنسيت ليك...
اليوم خيري في بعادك خلاص ما بقيت نتيق بيك...
نتجاهل كل ما كان بينتنا وقلبي حرام يحن ليك...
رجوعنا محال ، أنت اليوم ساعي وأنا ما بغيتو...
بلاش تفكرني في نار غدرك وما قاسيتو...
خليك لا تقرب راه بعادك ثوب خلاص لبستو...
ما ناوي نتخلص منو بعدما عجبني ولفتو...
كويت قلبي بالنار و إيلا برا بالجمار نزيدو...
نحسبك كابوس صحيت في صباحي ونسيتو...
وخيال مر عليا من سنين ما بقيت تفكرتو...
نشوف صورتك نحسبها جرح عميق وداويتو...
بريت منو لكن وشامو ظاهر وخا قلت محيتو...
يا خاين العشرة تمنيت كون ما عرفتك...
سعاد مبتهج
ليست هناك تعليقات:
إرسال تعليق