تعريشه
مالك قسيتي قوى ليه
يا ويله إللي تيجي عليه
تجيبي مرار وتطفحيه
واللي باعك وخانك بكل
حب وود بتضميه
ماية سلسبيل وتسقيه
واللي خايف عليك
مرارك ليه تطفحيه
مالك قسيتي قوى ليه
أنا إللي بنتلك تعريشه
عمدانها عضم من عضامي
حملت عليها سقف غطاكِ
زينته بحب وعشق وود
خليت ريحانه نسمة حنان
جدلتلك من الرمل أجمل
ضفيره
ميزتك بيها من بين النسوان
رفعتك واديتك أرقي مقام
صنعت من طينك أجمل كحله
كحلت بها عنيكي خليتك
أجمل من الغزلان
وكان ردك عليا
عميتي عنيا وبعتيني للزمان
مش عارف مالك قسيتي قوى ليه
دأنا إللي عرشتلك تعريشه
من زعف نخيلك وجدلتها
من دمي عملتلك الحمره
زينت بيها خدودك
وبالحب أنا صبغتها
ولما لاقيت الهواء هيعيكي
بجلدي التعريشه حوطها
وأنت مالك قسيتي قوى ليه
دأنا إللي عرشتلك تعريشه
علي ضهر نيلك ونصبتها
ومديت جواه شراييني
وخليت قلبي يضخ في
المايه ويديكي
علشان أرويكي وأروي أرضك
وأشغل سواقيكي
وأنت مالك قسيتي قوى ليه
دأنا إللي عرشتلك تعريشه
وساتر مانع يحمي حدودك
ضحكتي عليا وقولتي أنا
أمك وحتي أسأل جدودك
أمك هتغرق يا واد قوم
وعلي لفوق سدودك
جمد قلبك فك قيودك
أياك يابني الجبن يسودك
ولا العدو يخطي حدودك
أقتل عدوك كمل حلم جدودك
قتلت عدوي وقلت هكمل
أنت بأيدك إللي قتلتيني
لحد أمتي قسوه منك
راح هتحمل
وأنت مالك قسيتي قوى ليه
دأنا إللي عرشتلك تعريشه
توحد أهلي وشعبي وناسي
وفي عز حرك مشيتلك على
الرمل وطينك حافي
أستحملت شمسك وشلتك
فوق رأسي
وأنا مش لاقي تمن مداسي
وما جتش في مره قولت
دأنا بقاسي
وأنت بقسوتك غرستي في
الطين رأسي
أنت مالك قسيتي قوى ليه
دأنا أبنك إللي بإيديه عملك
تعريشه
كلها حب وعشق وحنيه
طلعتي أم قاسيه وما تعرفيش
الحنيه
يا شيخه حني عليا شويه
هو أنا أبنك ولا إبن جاريه
خدمت عندك شويه
لو مش أبنك قوليلي
أسيبلك وأرحل أشوفلي أم
غيرك تعرف معني الحنيه
أنت مالك قسيتي قوى ليه
دأنا إللي عرشتلك تعريشه
كلها حب وعشق وأمان
بتقطعي فيا كده ليه
داللي خانك عايش في أمان
وتمن خيانته فيكي عايش
سلطان
وأنا أبنك انجرح منك واتغدر
وأتهان
وجوه حضنك شاعر بالحرمان
أنت مالك قسيتي قوى ليه
كلمات أندرو فرج
عاشق نيلها
22/4/2018
ليست هناك تعليقات:
إرسال تعليق