مقصّر ولسَانك مترين
وما بتقبل كلمة منّا
ألف اسم الله ويخز العين
وشكراً بعدَك حاببنا !!!
مفكّر حالك انتِ الصّحّ
ونحنا الغلَط راكبنا
نازل فينا كل يوم دَحّ
تلطّف فينا وارحمنا ...
يا سيدي روق اتهدّى
بيكفي بنقدك تجرَحنا
غلطاتك لو منعدّى
بتخجل بعدها ترافقنا ...
رضيانين بكل شي فيك
وهيدا نابع من حُبنا
لفلفها الله يخلّيكْ
وكلمة حلوة سمّعنا ...
ما حدى كامل كلّنا عيوبْ
سبحان اللي خالقنا
لا بقى تنكّش يا محبوب
ولَو قصدك ما تخجّلنا ...
منحبّك طيّب حبوبْ
ما في داعي تعكّرنا
ما بدنا تقسى القلوبْ
ويشمَت يللي بيكرهنا ...
عامر ...
ليست هناك تعليقات:
إرسال تعليق