بنت أصول !!
شو يعني انّك فلّيتْ
بحجّة زهقان وملّيتْ
هيّاني أنا ستّ البيتْ
عايشة مرتاحة سعيدة ...
مش ناقصني كلمة حبّ
ولا نبض يحرّك هالقلب
ولا عشق يزيّن هالدّرب
يحسسني مَنّي وحيدة ...
شو يعني خنت اللي صان
وحرقت الحبّ اللي كان
ونسيت بلحظة الخلّان
وغرمت بوحدة جديدة !!
مش همّ دموعي والقهر
وانك بعت شريكة عمر
تركتها تتحرّق بالجمر
رفيقة دمعة وتنهيدة ...
اللي بيهم تتباهى وتنغرّ
وتصاحبْ مش بس بالسرّ
وتصَرّخ أنا هَيك وحرّ
وتتصرّف انّكْ سيدي ...
أنا فيّي أعمل أكتر
خلّيك من حالَك تضجَر
لكن ما بدّي اخسَر
روحي وشوهها بايدي ...
عامر ...
ليست هناك تعليقات:
إرسال تعليق