.
مقطوعة زجلية بمناسبة عيد ميلاد صاحبة بيتي وام اولادي اليوم ٢٤/٩/٢٠١٩ وأهديها للواحة الكريمة
**(( بميلادك ياست الدار))**
بميلادك ياست الدار .... عملنالك طنّة و رنّة
سرقنا من الجنة أزهار .. وطلعتي انتِ الجنّة
.....................................
هالليلة الفيها مسرور ....... بحلف فيها وحياتك
صرلي بْعدّْ عليها شهور ....... تا تنوّرني شمعاتك
لو عيّشني الرب دهور ...... خطواتي عا خطواتك
بزرع فيكي شجرة نور .. .....تعلى . وريتك تتهنّي
.....................................
بميلادك ياست الدار ..... عملنالك طنّة و رنّة
سرقنا من الجنة أزهار .. وطلعتي انتِ الجنّة
......................................
لا تظنّي ماني تعبان ....... وقت الأنتِ تعبانة
اللي عامل حالو انسان ....... في جواتو انسانة
متل الوردة بالبستان ....... انشفتك مرة عطشانة
بعصرلك كيس الأجفان ....... ولابخلّيكي تستنّي
........................................
بميلادك ياست الدار .... عملنالك طنّة و رنّة
سرقنا من الجنة أزهار .. وطلعتي انتِ الجنّة
.........................................
ولاد وسهرة ونغمة وعود ..... والبيت مسلطن كلّو
والغايب صفّى موجود ..... وجايب ورداتو وفلّو
علوّا الفرحة عليكي تعود ..... والأيام بيتحلّو
ولطف الرب عليكي يجود ..... وتنالي شو بتتمنّي
.......................................
بميلادك ياست الدار .... عملنالك طنّة و رنّة
سرقنا من الجنة أزهار .. وطلعتي انتِ الجنّة
..............................................
بقلمي : رامز سلمان حسن
ليست هناك تعليقات:
إرسال تعليق