ونعم الزوجة ...
فضفضلي لا تخبّي عليّي
يا عمري أنا بيت سرّكْ
دموعك عم تحرق عينيّي
عم حسّ بطعمة قهرك ...
بعرف حامل حمل جبال
كرمالنا مضيّع عمركْ
راح تبقى بعيني رجّال
ما في قوّة بتكسِر ضهرك ...
يا سَندي وأغلى مخلوق
بهالدنية لا تحمّلها
طوّل بالك بكرى تروق
وربنا العاطي بيفرجها ...
العيشة صعبة وبدها صبر
وانتِ قدّها وقدودها
اوعى لحزنها تجرك جرّ
وتيأس من فرَج وعودها ...
مين النا غيرك يا غالي
بهالدنية تا نخاف عليه ؟
يا قلبي وعمري ورسمالي
يا شّايل همّنا بعينيه ...
ارميها عا الله كرمالي
بيحلّها مش صعبة عليه
راح يبعت كَرَمُو من العالي
معوّدنا يبسِط ايديه ...
عامر ...
ليست هناك تعليقات:
إرسال تعليق