مين بيعرف ظرف التّاني
تا نتّهمو بأنُّو أناني ؟
وأنّو المُخطِي وأنّو الجاني
ونلومُو وما نقصّر فيه ؟
ما سْمعنا قدّيشو مْعَاني
عايش بجرُوحو وَحداني
الْ ما عندو كاني و ماني
شو صعبة نتجنّى عليه ...
ما في أسرع منّا بالتّهمة
بننطر صاحبنا عا الكلمة
ومننسى العشرة واللقمة
وبجرة قلم مننهيه ...
يا ريت كنّا سمعنا منّو
وخففنا أحزانو وهمّو
أو بمحبّة سألنا عنُو
من بعدها بعدل نقاضيه ...
ما بعمرا الألفة بتتّغير
أو ممكن عا موقف نخسر
غالي كان بحبُّو أكبر
من هفوة محسُوبة عليه !!
شو بيبقى بهالدنيه يحرُز
لو عا الغلطة نجنّ وننؤز
ونصير بخناجرنا نغرُز
صاحبْنا وننسى ماضيه !! ...
عامر ...
ليست هناك تعليقات:
إرسال تعليق