الكلمة الطُيبة !!!
نيّالها الكلمات الحلوة
قدّيشها بتحمل إحساس ..
بتخلّي الْ قايلها مَلك
وبتقدّروا قدّام النّاس !!
اوعى تجرِّح ب اللّي حَدّك
وخصوصي الْ طبعو حسّاسْ..
تا ما يقلب بثواني ضدّكْ
ويريّح منّك هالرّاس !!!
مو شطارة تقسَى بالكلمة
وترميّها من دون تفكير ..
قديشك راح تئذي وتجرَح
بحروف الْ مالها تبرير !!
عندك كلمة حلوة قولها
النّاس بتحبّ المَدح كتير ..
وان ما عندك خلّيك ساكتْ
لا توقّع حَالك بالبير !!!
في كلمة سكّينها حدّة
بتجرَح ما بيشفَى وجَعَها ..
وفي كلمة وكأنها وردة
بتعطّر يلّي سمعَها !!!
حطّ حالك بمكان النّاس
شويه تا تحسّ بدَمعها..
ولا تضلّك عم ترمي حروفك
عا قلوب كافيّها وجَعها !!!
عامر ...
ليست هناك تعليقات:
إرسال تعليق