وجنَت على نفسها !!!...
كتّر خيركْ ع الإيام
اللي مرقت متل الأحلام
بديتيها مع فصل الحبّ
نهيتيها بفصل الآلام ...
ما كنت مفكّرك رحلة
تمنّيتك دهر وأعوام
طلعتِ يا خسارة نَحلة
قرصتيني وقلتيلي سلام ...
كان فيكِ تفلّي عنجدّ
وتنهيني من غير آلام
ما تخلّي القسوة هالقدّ
قبلْ تنفيذ الإعدام !!!
بس انت زرعتي هالحقد
تا الشرّ بعينيّي حام
خلّيتيني ارمي الورد
وجهّز لعيونك السْهام ...
شو كنا خسرنا لولا
بقينا من بعدها أصحابْ
وتضلّي بعيني أغلى
من ناسي وكل الأحباب ...
ويضلّ ال بينّا ذكرى
حبابة عشقتْ حبابْ
افترقوا عن قهر وحسرة
واحتفظوا بكل الأسباب ...
عامر ...
ليست هناك تعليقات:
إرسال تعليق