/ قطار الشعر /
بقطار الشعر غافلت اعتصامي
ودخلتو اليوم من بابو النظامي
وجبرتو يروح ويغيّر مسيرو
ع سكة فكر صح كتير سامي
حملت من الشعر جعبة جريرو
عزلت حروف نقّيت الأسامي
وأخدت من الشعر صحوة ضميرو
ومن الأحلام هالنص الأمامي
سحبت من الورد فوحة عبيرو
وجمعت من الصبا زهوة غرامي
ومن الإبداع معصورو وخميرو
تعبّي الكاس من خمرة كلامي
أخدت من الحلى لمسة حريرو
ومن الأحزان آخر إبتسامي
ونسجت من العشق ضحكة سميرو
ومن الحرفين قاموس انسجامي
وعزلت المر عن علقم مريرو
محيت حروف هالفكر الظلامي
اكتمل هالشعر من بصمة مديرو
بعد ما كشفت عن قصد الحرامي
عملت مخلوط شو طيّب عصيرو
وسكبتو بمزهرية حب شامي
تقدّم بالشعر خلطة جديدة
لَكل الناس مع كل احترامي .
- د. عيسى فضة -
ليست هناك تعليقات:
إرسال تعليق