************{ راجـع نفسك }************
"""""""""""""""""""""""""""""""""""""""""""""""""""""""
راجـع نـفـسـك وفكـر الـغـلـطـة غـلـطـة مـيــن
ومـيـن اللـي قلبـه أتغيـر ومـات جواه الحنيـن
مين خلى الحلم وهم ومين عنده أصرار وعزم
يـشـوف دمعاتـي دم والـفرحـة ماليـة العينيـن
خلصانـة ومـن النهـاردة أنا وأنت هنبقه أتنـيـن
ماالقلب اللي جمعنـا روح واحدة أتقسم نصين
شكـرا وكتـر خيـرك مـن بعـد مـامـات ضميـرك
بقـه زيـك زي غيرك فـي القلـب كمـان والعـيـن
حنينـي عليك واللهفة بقـوا ماضـي ويـا ذكـرى
عيـش وحدك من النهاردة ويا الشـوق والأنيـن
أنسـى اللي بينـك وبينـي أوعاك تاني تنادينـي
أنـت سـقـط مـن عيـنـي خـلاص ليـوم الـديـن
هاتشوفني وأشوفـك عادي ولا هتحرك فؤادي
أنت ف وادي وأناف وادي وداع ياحب السنين
تغيب ماتغيب ع عيني طيفك مابقاش يجيني
ياخـد بأيدي يواسينـي ويصحي نبض الحنيـن
هاخد قلبي في حضني وأهدهد عليه زي إبني
وبينك وبيني هبني صور أكبر من صورالصين
وهـعلـم قـلبي يـفـرح وللدنيـا حـضني هـفتـح
ولايمكن لعنيه هسمـح بدمعة تبات ع الخديـن
هفـرح وأعيش اللحظة وأبدأ حياتي من بكـرة
أحساسـي لو خاني مـرة صعب أتخـان مرتيـن
نصيـحـة وخدها منـي بُعـدك مـش هيمـوتنـي
لو مـن نظـرة بتفهنـي هتسكـت وتقـول آميـن
م بين الناس أخترتك وع قلبي وروحي أمنتك
الحلوة والمُرة قاسمتـك بقلب وعيون راضيين
دلوقتي أما بسمع سيرتك أنابندم لأني عرفتك
وبحمـد ربنا أني كشفتك وقطـع الشك اليقيـن
بدعيلك مش بدعـي عليـك أشوف دمعتك في
عنيك وحداني ف دُجـى لياليك مبلول الجبين
بتناجي بخلوتـك ربـك ع أمـل أنه يقبل توبتك
أفتكـر أني ياما نصحتك بالشدة كمان والليـن
أديـك ياولـداه نـدمـان وبتعانـي مـن الحرمـان
بتحن لليالي زمان وع قلبي اللي ظلمته حزين
دموع الندم ماهتنفع ولا عمر الزمن راح يرجع
أنساني وسيبني أجمع قلبي اللي أتقسم نصين
بقلمي..................................... حسن ابو ابوعلي
ليست هناك تعليقات:
إرسال تعليق