/ بتتذكري /
بتتذكري يوم اللي قلتيلي استوى التفاح
بلهجة خجولة كتير بتنقّط لطافي
واحمرّت خدود الورد هالأبيض الفواح
صار الهمس متل العسل معجوق عشفافي
ولمّا نعس هالليل وبلّش يلم الوشاح
وج الصبح جيتك أنا متلبك وحافي
ع الباب كنتي ناطرة وإيدك على المفتاح
وبيّك بسابع نومتو عم يشخر وغافي
قلتي حبيبي خود من رمشي غطا وارتاح
بلمح البصر شعرك نزل يرقص على كتافي
ولمّا ع باب الليل دقدقلي الصباح
شربنا سوا كاس العشق والشوق عالصافي
رحنا افترقنا غصب عنا وراح يللي راح
بتذكرك قلتي حبيب القلب لا تجافي
بتتذكري ضحكت وقلت قبل الوداع
عندو العشق ياروح سبع رواح لا تخافي.
د. عيسى فضة
ليست هناك تعليقات:
إرسال تعليق