/ شو باقي لكي /
لمّا الحكومة تصير مجروحة حكي
بتتمرجح بكذبة خطيرة محنّكي
بتكون لعبة بملعب جنون الزمن
بين الحقيقة والدجل والفبركي
وبتشرنق الإنسان جوّات الشجن
وفيها خيوط الشرنقات مشربكي
وبتبيع عمر الناس بِأرخص تمن
وعلى كوع هالدولار هيّي بترتكي
والسوق سودا والشعب قلبو اختزن
نزف الجرح ، عا مين بدو يشتكي
هيدى الشعب يا هالحكومة المؤتمن
مع جيشنا يللي انتصر بالمعركي
عند المسا بينام ع فراش المحن
وعند الصبح بيفيق عا تخت البكي
يا هالحكومة صار وقتك مرتهن
للنهب للفوضى وفساد ولوفكي
ونحنا بوطن إلّا بكرامة ما انسكن
التاريخ شاهد حي ع الشعب الذكي
قومي انزلي بكير عن ضهر الوطن
ما بتخجلي من العيب شو باقي لكي ؟!!
د. عيسى فضة
ليست هناك تعليقات:
إرسال تعليق