/ انتخب مرزوق /
مسؤول قلّو يا مواطن روق
وحاجي بقى تقلّي أنا مخنوق
توكّل ع ألله القادر الجبّار
وخلّيك سايق عا هوى هالسوق
حاجي صرعتني بالصبر و الإنتظار
نحنا بحرب شو نسيت يا مخلوق
روح انتخب تنكمّل المشوار
واسماع مني وانتخب مرزوق
مرزوق شب مليح عندو بار
وكتير بهموم الشعب معجوق
نزلت دمعتو هالمواطن صار
يلملم قميصو المهتري المخزوق
بلهجة مريض معتر وختيار
ملهوف قلّو من قلب محروق
ياسيّدي الأسعار صارت نار
وصرنا بزمن مجنون مش مسبوق
فوضى وفساد كبير واستهتار
ما بنتخب تيصير عندي حقوق
رغم الفقر والجوع والأخطار
بنك الشعب يمكن طلع مسروق
يا سيّدي يلعن أبو الدولار
التجار بيبيعوا الوطن بالسوق
يا سيّدي وبعدك عم تقلّي انتخب
ونحنا بحالة شم أوعا تدوق؟!!!
د. عيسى فضة
ليست هناك تعليقات:
إرسال تعليق