لتفطّريني زبيب مستني العصير
ولتعوديني فيق ع خبز الفطير
فنجان قهوة مُر من يدك بريد
ع شُرفة الشباك وشوية عبير
**
ع روضك الفتان ومروج الحلا
هون العبادة كلّها صوم وصلا
وإنت قبالي بثوب رفرفه الهوى
مافيه عروة وتحته ملمس حرير
**
شو بألّهك تقديس ربّات الخدر
شعرك ضيائي ولون عينيك بحر
ولو رجّعوا التكوين ليلة جبلتك
كان البدر ع مهبط سريرك سفير
**
لكنّ آدم هيك يخلق من بلا
حتى بفتونك هبط من أعلا عُلا
قد فكر التفاح طعمو يناسبو
مش عارف التفاح إقطافو عسير
**
مع كُل هيدا القلب خفّاقٍ حنون
رمشك كحد السيف والبارز فتون
ياريت صدرك بالمنية رخامتي
لو يكتبوا الشّعار مستشهد خطير
( سلمان حسن)
ليست هناك تعليقات:
إرسال تعليق