(فيروس) شعر محكي
فيروس دوب يعاينو المجهرْ
هزّ الخليقة وخوّفْ الإنسانْ
ودولْ عُظمى جيشها استنفرْ
كنّو الكورونا جحفل الطغيانْ
وحالة طوارىء بلّشتْ تظهرْ
وحالة حظرْ ومقاطعة بلدانْ
والأتّصال انشلّ وتسكّرْ
عاالأقتصاد وبلّشْ الكسدان
تقولْ البشر لسّاتهم أصغرْ
من قتال فيروس وحرب ديدان
ياهاالدني إنسانك تكبّرْ
وتصلّفْ بفكرو ونسي الرحمن
وعاف الألوهة وحكمها كسّرْ
وخلّا ملذّاتو صنم منصان
وبينحرفْ كل ما بيتطوّر
تاصار من بين البشر حيتان
عاف المحبّة وشمخ وتجبّر
ومن فؤادو غادر التحنان
ألله تأنّى كتير وتصبّر
وقال بلكي راجع الحسبان
ولمّا تمادى كتير وتنمّرْ
وضيّع مسارو وخربط الدوزان
خلّا شياطين الوبا تصفرْ
وينفث سمومو القاتلة التعبان
بلكي تفيق عقولنا وتشعر
وتذكر إلاها خالق الأكوان
وبلكي الضمائر تنهض وتسهر
وتسكب صلا توبة ودمع إيمان
وعن خطايا السالفة تكفّر
ويعمر قلب مخصوص لاألله
فيه المحبّة قاعدة بنيان
شعر: بسام إسبر
ليست هناك تعليقات:
إرسال تعليق