عناقٌ بعدَ فِراق ...
والله قسْيتِ وكتّرتِ
قلبي ما بقى يتحمّلْ
محروق من يومْ مشيتِ
ودمعي بعيوني تغلغل !!!
نشّفتِ عروقي ودمّي
بغير الصلحَة ما بقبلْ
دخلك نسّيني همّي
لا تخلّي ورودي تذبل ...
جهّزت السّهرة والعود
الليلة بدّنا نتدلّل
بالحبّ نغرّد ونجود
ما نخلّي شفافنا تخجلْ ...
لا تقولي الرّجعة بكّير
سَاعة من وقتْ الْ بوصَلْ !
راح ارمي السّاعة بالبير
وخلّي الحَاسد يتفلفلْ ...
شو حلوة لمّة الْحبابْ
بعد فراقهن ما طوّل
ما يقضّوها لوم عتابْ
يغازل فيها وتتغزّل ...
الفرصة ما بتبقى أيّام
بدنا نصيدها وما نسألْ
من بعدها نعيش بأحلام
مش وقتها هلأ نغفَل ...
عامر ...
ليست هناك تعليقات:
إرسال تعليق